Minisitiri w’Ubuzima, Dr. Sabin Nsanzimana, yatangaje ko bitarenze tariki 1 Nyakanga 2025,mu rwego rw’ubuzima hagiye kubamo impinduka zinyuranye hagamijwe gutanga serivise y’ubuzima inoze.
Muri izo mpinduka harimo kuba amavuriro y’ibanze arimo ibigo nderabuzima ndetse na Poste de santé bigiye kujya byishyurwa n’ibigo by’ubwishingizi mbere yo gutanga serivisi, bitandukanye n’uko byari bisanzwe bikorwa.
Minisitiri Dr Nsanzimana yavuze ko kwishyura mbere bigiyeho mu rwego rwo gukemura ibibazo by’amikoro, bikunze kugaragara muri aya mavuriro kuko uburyo busanzwe bukoreshwa bwo kwishyurwa nyuma budindiza serivisi zitangirwa, kuko yakoreshaga amafaranga make na yo agatinda kubageraho.
At: “Ku bigo nderabuzima usanga bakoresha amafaranga macye, ku buryo n’iyo wabatindira icyumweru kimwe gusa usanga bigira ingaruka ku baturage, kuko baba bakoresha nka Miliyoni imwe cyangwa ebyiri mu kugura imiti ndetse n’ibindi bikoresho. Rero iyo bakwishyuje ukabatindira abaturage bagana ivuriro basanga nta miti ndetse n’ibikoresho bihari.”
Iyi gahunda Minisiteri y’Ubuzima iyifatanyijemo na RSSB, kugira ngo amavuriro mato ajye yishyurwa mbere, aho kugira ngo bizajye byishyura nyuma nk’uko byari bisanzwe.
Minisitiri w’Ubuzima yagaragaje ko kwishyura mbere ntacyo bizangiza, kuko ingano y’amafaranga bishyura akenshi adakunda guhindagurika bitewe n’ibyo baba bakeneye.
Yagaragaje ko nubwo bizahera ku mavuriro mato n’ibigo nderabuzima, bizakomereza no ku bindi bitaro uko bizagenda bitanga umusaruro.
Ikoranabuhanga mu buryo umurwayi yivuzamo
Minisitiri Nsanzimana yavuze ko taransiferi z’abarwayi zizajya zitangwa hakoreshejwe ikoranabuhanga harimo gusaba kuba wahura na muganga, kwivuza ndetse no kwandikirwa imiti.
Yakomeje atangaza ko hagiyekongerwamo na serivisi yo kujya batanga taransiferi ku barwayi aho guhora bagendana impapuro bafotoje.
Ati ’’Ntabwo bikwiriye ko umurwayi agendana impapuro enye harimo fotokopi yo koherezwa ku rindi vuriro (transfer), Fotokopi y’ubwisungane, Fotokopi y’indangamuntu ndetse na nimero y’umwanya ari bwinjirireho ajya guhura na muganga.
Gushyiraho uburyo bw’ikoranabuhanga Minisitiri avuga ko ari ikintu cyiza, kizihutisha serivisi ihabwa umurwayi, akajya asanga amakuru yose arebana n’uburwayi bwe ahari kandi bikamworohereza guhabwa serivisi.
Ati “Twasanze ari ikintu cyiza kandi bizaba mu mezi make, navuga ko muri uyu mwaka iyi servisi izatangira gukora, ikorohereza abarwayi ndetse n’abaganga babakurikirana”.
INKURU YA TETA Sandra
